أبواب

     

    تگدر تدگ الباب..

    الباب، لوح الخشب،

    مصبوغ ومدردغ وملوّن وجذاب

    بس… ما يرد الباب

    ولوما  أسمعك تدگ

    ما ينفتح لك باب.

                   

    بابك منقّط شذر مرسومه بي نجمات

    بالأزرگ اسمك، تحت، مكتوب بالدمعات

    وتحت التحت، رزته، مديوفه باللذات

    بابك مناطر فرح موعود بالغياب

    حاميك چف الحسد مرسوم فوگ الباب.

     

    بابك مزهّر ورد طالع ندى بعتبته

    وببابي نابت عطش من عروته لرزته

    ريحة الحضره ببابك والحمدو والتسبيح

    بابك يجيب الفرح.. وبابي يجيب الريح.

     

    بابك دفو بالشته وبالصيف جرّة مي

    بساط العصر بابك ومغطى بالفي

    متروس بابي سهر وبابك ينام العصر

    بابك منمنم خرز ومطرز وغافي

    بارد هوى عتبتي وبابك ندي ودافي.

     

    بابك مراية عرس تتمرى بيه الناس

    مديوف بالحنه ومعرّش بياس

    بي آية الكرسي والحمدو والخناس

    دگات بابك غير.. وبابي إله دكات

    بابي تدگه الريح.. وبابك تدگه الناس.

     

    بابك زغير وحلو مقفول ومندّه

    يسبح بمي الورد بالفتحه والسده

    ناطرت بابك عمر، شو طالت المده؟

    بابي مشرّع دوم.. محد يجي يرده.

     

    بابك جناح وهوى يودّي ويجيب أحباب

    وبابي مبسمر صبر يتنطر الغياب

    مليان بابك حچي ومليان بابي عتاب.

    الى الاعلى

 

 

 

تالفه روحي بغيابك

 

تالفه روحي بغيابك

عتب ليل موادعك،

شباچ حزني مشرّع من سنين،

من سديت بابك

ليله وحده أرد أصلي بحضرتك

أرد أهز شباچ حزني

وحيل...حيل أبچي عله بابك

لا تعاتبني عله حزني وأنته حزني

أنته سجادة صلاتي،

وأنته آخر نبي بعمري

تابعك وأنته الوصي

تنقص بروحي وأزيدك

شلون أشوفك وأنته شوفي؟

لا تعودني عله طبعك سوله طبعك

سولة مشابگ وحسبة ليل ما يخلص عذابك

أرد أشمك مرة وحدة، وحيل ..حيل أبچي عله بابك.

الى الاعلى

 

 

غيمة نوم*

 

طولك سؤال الليل

غيمة نوم عطرك

أصحى وياك ماخذني المطر

تحت مخدتي بير الدمع

ماظل غير كاسك والشتا ومنقل حزن

ليل يجيب ليل

وأنته تسألني عله حزني

ثلج غيابك البروح حارگني حرگ

أبرد وأنطفي،

وأشرب بصحة غيابك

 ماظل غير كاسك والشتا ومنقل جمر

ليل يجيب ليل

وأنته تسألني عله حزني

وك هذا الجمر گلبي

وهذا الخنجر المسموم هجرك

ياكل بروحي غيابك

تحت مخدتي بير الدمع

ماظل غير كاسك والشتا وضو الشمع

شگد رماد تفتت بروحي؟

شگد طشيت بعيوني سهر؟

ليل يجيب ليل

وغيمه تجيب غيمه

وآنا ماخذني المطر...

 

* القصيدة لاتزال في التنور!

 

الى الاعلى